星之旅（一）

新年假期去了新加坡, 一如所料, 同屋企人去, 結果都會係悶, 悶, 同悶. 最大原因係, 新加坡差不多所有唐人開的食市都休市. 所以, 雞飯, 肉骨茶, 所有我有興趣食嘅, 通通都無得食. 想買嘅林志源又無得買. 當然, 聰明的我, 晨早已經問過我老豆查實有無鋪頭開門. 當然我老豆亦都一貫吹水作風, 話大部份都會開. @@ 佢自己講無得賴人！

唯一滿意的是在珍寶吃的海鮮晚餐！（同香港嗰間有無關係？）好吃到一個地步，連我那食家般（佢話自己係食家喎）的細佬都會有以下對話：

他：（食到後段的時候）我好想大叫呀！
我：點解你要咁做呢？
他：點解可以咁好食？？？
我：咁你想點大叫法？
他：好似味吉洋一（？）裏面食神咁大叫＂好好味呀~~~~＂
（然後佢仲要好似學友咁震音）
我：=_________=•••••

但那頓海鮮真是衷心的覺得好好味。而我細佬一直都是沈默寡言的人，有以上的對話是世紀奇聞來旳！

生命中不能承受的蠢

在澳洲牛奶公司遇見一個好蠢的女人。那女人坐在我旁邊。澳洲牛奶公司是一間餐牌簡單都不能再簡單的食肆。只得快餐或常餐 （無錯，就好似麥兜的故事！）

快餐 （$26) 有牛油包，煎雙蛋，熱鮮奶。
常餐 ($30) 有牛油包，煎雙蛋火腿，叉燒意粉，咖啡或茶。

唔想叫餐，可以散叫。但如果食三文治叫野飲，一定係叫餐平啲。就係咁簡單。坐在我旁邊的女人，想叫常餐，但係又話食唔晒。個哥哥就叫佢食快餐，跟住佢又話想食三文治，個哥哥已經話個餐可以轉三文治。跟住佢又問散叫腿蛋治同熱鮮奶要幾多錢，哥哥話要$31。佢話：“咁散叫咪仲平？” @@ 我當堂呆咗。心諗：點呀，識唔識計數㗎？

最後，攪完一大輪，佢係叫咗腿蛋治同熱鮮奶。盛惠$31元整。

唉！！！點解會有啲咁嘅人架！！！ 我一路食，一路好想問佢：你識唔識計數架！？？

牛一

過了忙碌的一星期，但要做的始終都不會有完結的一天，所以都係算吧！

今天過了開心的一天....

＠ 朝早去上班，做了一整朝早的bumblebee。

@ 下午約了朋友仔們吃飯，又是充滿我至愛的無聊時刻。

@ 午飯後，過著闊太般的生活 ：去發型屋剪及電發。@@" 之前的我勢神劈願話唔再電發，今朝只是盤算著修剪少許，頂多剪少少留海就算。點知入到去就一發不可收拾!!! =.= 又再次攪足四個鐘！走時，我感覺我pat pat已經由3D變成2D。

@ 之後，飛趕去與貓男友及他好友kp和女友吃晚飯。皆因他們生日都在十二月，我之前係 sherrybelly 店鋪 order 咗生日杯蛋糕。杯蛋糕上寫了貓男友及kp的initials。超級可愛耶！ （味道仲好好喎！好真材實料，皆因食完後飽到上心口。）

 ＠ 除了杯蛋糕，在 sherrybelly 處還 order 了好應節的聖誕節曲奇。要了雲呢嗱和 earl grey味。無錯，係影唔到啲曲奇嘅！（至於好唔好味，就要聽日問吓壽星仔先知嘞！）

 ＠  希望大家有一個快樂的聖誕~~

四川辣辣辣....

近期, 心思思想再次吃辣. 便到家附近出名四川店買外賣. 第一次只買了口水雞酸辣粉.

好喜歡它的麻辣味道. 用了好香的香料. 吃得出放了好多花椒. 但口水雞反而無咩特別. 就像普通白切雞. 不過整體味道都算一流!! 第一次買所以只叫了小辣但已經覺得頗辣. 吃完後, 好想下次試中辣.

時隔幾個星期後, 再去幫襯. 買了酸豆肉碎酸辣粉同麻辣青瓜. 回家時, 一開個外賣盒....點解青瓜係白色同埋有腳趾嘅? (老眼分花??) 原來俾錯咗雞腳我.... v_____v 不過算數, 照食!!!

今次依然叫了小辣. 酸豆肉碎幾好味. 但因為吸了辣油, 所以愈食愈辣! 好刺激!!! 麻辣雞腳本身望落去好似一啲都唔辣. 但當我KO整盒時, 係辣到出唔到聲 >< 一個人食一盒實在太多啦!!!

結果今朝肚痛到爆炸!!!! 下次會挑戰涼麵同其他小食.

p.s. 這間四川小店, 原來每個月好似 21 至 27日都唔開門, 聽講老闆每月都親自去四川買食材回來. 好認真呀!!!! 我會多多幫襯~

高茶

過去的星期日, 與朋友仔們去了ifc內的agnes b吃high tea. 這是我頭一次去agnes b的餐廳. 好高級嘢.....

三個人叫了貴的 tea set ($318). 比起 $288 tea set 多了兩杯 oyster shot 同兩個 lobster with caviar. 吃完了整個 tea set, 最好吃的是 oyster shot. 用上了 rum, 加了點 lemon juice 和 green apple dice. oyster 應該係 kumamoto. 但其實 oyster shot 一點製作難度都沒有, 只要有新鮮的貨源.

其餘的都實在太普通. 一點特別都沒有. 有點兒失望. 但要讚的是他們的室內環境, 有著令人很舒適的感覺. 三小時的下午茶在毫無先兆下就過了. 快得令人詫異!!

為了延續我們的食食達人傳統, 今個星期日會再次在家煮飯仔. 好, 研究食譜去!!!

食物的奧秘

最近在想, "呀....中國人真的很愛吃." 吃重要到, 無論什麼環境, 食物都會是其中一個要討論或預備的環節.

> 朋友相聚見面, 要討論去邊到食飯
> 同親戚見面, 總是食飯
> 拍拖, 會問 : "去邊到食飯好?"
> 結婚, 親戚朋友第一時間係問你係邊到擺酒
> 白事, 亦係要話俾人知你係邊到擺解穢酒
> 丈夫回家會問太太 : "今晚有咩餸?"
> 媽媽會問仔女 : "今晚番唔番嚟食飯?"

食物就好像人與人之間無形的連繫. 每天, 默默地維繫著不同的關係.

我在想, 如果我不再需要做食食達人, 我究竟有啲咩生存意義???????

一周回顧

＞星期日同朋友仔睇Grease，好睇到無嘢好講。故事好簡單兼老套，但成套musical嘅精髓係佢啲歌同舞。簡直會令人熱血沸騰，令人好有衝動由座位彈起一齊載歌載舞。去到尾聲，全場high爆，一齊起身又叫又跳，同睇演唱會無咩分別。滿足至極。令整件事嘅滿足程度推到頂點嘅係：張飛半價囉！！！

＞有天心血來潮，想感受一下冬天嘅氣氛，所以去星巴克買咗冬天先有嘅gingerbread latte同新出嘅caramel cheesecake。整晚什麼都沒有吃，在家歎latte同cheesecake。感覺時間好像為我停頓了。

＞係屋企執拾時，發現了好友前一陣子送我的小禮物。係一個好cute嘅grand piano nano block。好好好喜歡！個包裝好靚所以一路都唔捨得拆。但唔拆又無得玩。我諗都係時侯開封㗎啦！唔捨得呀！！！><

＞最後送上近期肥貓艷照一幅。希望大家努力。周日就快到㗎啦！！！！ROAR！！！

家中的飲料

 我家中雪櫃可以長年累月甚麼都無，皆因我甚少煮食，連水都唔飲多啖。但我靚媽係都好鍾意起勢咁俾嘢我。

玫瑰花茶：呢隻牌子好似好鬼貴 @@ 靚媽好dum本

有機茶包：係英國買。高檔野喎！裡面有八十個茶包囉痴線！

杭州嘅雨前龍井 ：呢罌嘢應該飲十年都飲唔晒 ><

杭州嘅菊花。配雨前龍井幾好飲㗎。

因為呢排經常貧血，所以靚媽又俾紅棗，杞子同龍眼肉我煲水飲。

靚媽又話得閒要煲下花旗心水飲喎。

自家製嘅咸金桔。好味道。

唔幾得邊年christmas交換禮物抽到嘅blueberry bliss tea。

日日都要不停係咁飲先可以飲晒佢地囉！點攪呀？？？

邊爐王

我打邊爐system正式啟動!!!

我要打邊爐呀!

假日食食食

中秋晚上回家做節. 去cwb搭小巴, 嘩, 不得了. 多人到完全迫爆條路. 平日唔使等就可以上車, 結果個日等咗三十分鐘先上到車. 仲要落緊雨, 係咁俾人用雨傘左tuk右tuk. 差啲盲咗. 回到家後, 累到即刻要訓覺, 訓咗一個鐘, 然後起身食飯. 依家我brother變了我家的御用廚師! 每次都係佢煮飯! 好勁! 食完飯後, 即時攤屍係沙發睇電視. 一口氣睇哂天天天晴, 公主嫁到, 同埋翻叮一族. 好耐未一次過睇咁多電視啦! (隻眼受到嚴重威脅 @@)

星期四相約余生余太食午飯. 好興奮!!!! 去伊呂波食燒肉. 好味道!!! 跟住去了the one商場, 吃了tuttimelon的 frozen yogurt. 第n次去 tuttimelon, 好喜歡 tuttimelon, 不單是因為他們的 frozen yogurt 美味同埋可以自己任整 froyo任落 toppings, 還有的是他們在商場內有一個室外露天地方俾顧客慢慢吃 frozen yogurt. 覺得自己好似身處係香港以外的地方. 同場仲有華仔呀!! o係到宣傳他的新戲. 好多fans囉! (aka 超嘈!)

去到晚上, 我將自己的第一次俾咗吉野家. 當我話俾 mau mau 聽我從未食過吉野家, 佢好似見鬼咁 "你未食過吉野家 ???" (拉長三秒) 係. 無錯. 我從未食過吉野家!!!! 不過, 現在的我已經食過吉野家啦. 以他們的價錢, 我覺得係抵食嘅. 火鍋唔錯. 最好食係個烏冬. 讚歧烏冬, 超彈牙! 他們的招牌牛肉飯, 飯係用珍珠米, 同埋有好多牛肉. 都唔錯.

全日就係不停地食食食. 係時候要節食!!!! ROAR!!!

無聊篇

> 曾幾何時, 我個胃係無敵嘅. 食任何食物都無問題. 油膩煎炸曾經係我的至愛. 但自從幾年前食錯嘢後, 個胃就彷彿死了一樣. 不能再食過多嘅油膩煎炸食物. 好好好傷心. 前日, 我完全唔記得呢個傷心嘅事實, 下午發咗癲去買 (1) 4件煎釀三寶 (2) 一串魚蛋 (六粒) (3) 一串燒賣 (六粒) (4) 一條司華力腸 (!!!!!!) 唔使問當然係食唔哂 =.= 食咗三分一已經飽到傻咗, 跟住仲要開始胃唔舒服.真係攞苦嚟辛.

> 好想去旅行好想去旅行好想去旅行好想去旅行好想去旅行. 想到一個地步雖然係唔會去, 但係買哂啲旅遊雜誌番嚟係咁睇. 仲上網睇哂自遊行價錢. 愈睇愈想去!!!! ><

> 頭先去茶餐廳食下午茶, 坐係我後面嘅兩位人兄, 由我坐低到開始食到食完, 佢地嘅談話內容不下幾百個粗口. 一路聽住粗口原來好難食得落. @@ 咩事幹可以講咁多粗口呢?

> 好想大哎一聲 : 使唔使咁悶呀??????

忿怒的午餐

午飯時在一間食店內的待遇好到令人髮指.

食店趕客絕招:
> 係你食完碟飯0.1秒內收哂所有野.
> 飲品嘅糖水唔理你用完未, 照收!
> 收哂野你都唔走, 伙計會係你臉前tuk口tuk臉咁set枱俾下一輪客人!
> 如果咁都唔走, 伙計會叫下一輪客人入嚟企係你張枱旁邊 (!!!!)

做到咁絕, 真係唔走唔得.

但我想話, 呢間食店, 唔係茶餐廳, 唔係大排擋, 佢係一間個款ok既餐廳. 食物唔特別好食. 食個午餐要最少$60喎! 同埋只不過係45分鐘囉!!!

大家千祈唔好去呢間無良餐廳!

Triple XXXX or XXXXXX King (係上環維德呀)

記住呀!!!!

十個嬲!!!!!!!!!!!!!!!!!!!!!!!!!!

casa fina

這幾日, 都混混沌沌的過了. 好像有好多重要事要做 (唔係好像, 係直頭有好重要既事做), 但又好像沒甚麼想做. 我個人就係咁. 已經好耐沒有事情可以令我雄心壯志 (!!)

好!! 由呢一刻起, 我要為所有重要事情努力!!!

>>>>>>>>>>

昨天與朋友去了cwb henry house 既casa fina吃晚飯. 他們主打係生蠔同西餐. 可以話係好滿意既一餐. 兩個人吃了:

十隻蠔 -五款不同的蠔. 廚師會幫你排由淡至濃. 好味!!!

波菜蠔湯 - 吃得出湯用了海鮮去煮, 然後用blender打入波菜. 幾好, 唔錯.

鵝肝野箘扁意粉 - 呢個意粉好味到暈. 意粉是al dente (!!!) 好香鵝肝味. 但亦都"lau"都暈咗.

US prime rib steak -  廚師既煮功好好. steak有char-grilled的味道. 但比我要求既七成熟過熟了一點. 但overall個steak都幾好味.

呢間餐廳既waiters/waitresses全部都好好禮貌同笑容. 值得推介!!!

報告完畢.

一個字: 好飽

睡太多, 有錯覺, 以為夢是真, 嚇得自己騰騰震. 標晒冷汗. @@ 點解成日都發惡夢哩? 好明顯係壓力大!!!!! (自問自答)

今日買咗好重要既野! yeh yeh yeh! 然後同爸媽食shabu shabu放題. 真係人出食物, 我地出錢同出命. 飽到想死. (比飽到想嘔更嚴重!) 最衰就係有haagan daz雪糕任食添囉. :S 惡攪!!!! 訓覺前做一千下situp都唔掂呀!!! 要做夠一萬下!

>>>>>>>>>

心情總是高興不來. 有好多值得我高興好耐的事情, 我只會高興五秒. 點解經常只在below average的線以下? 費解. 何時可以above average呢?

串串串串

今日放工去食久遺了既串串. 好嘢!! 但因為腸胃唔好, 爭扎咗好耐究竟食燒賣好定係魚蛋好. *____* 兩樣都係我既至愛. 最後我係忍痛咁選擇咗燒賣. (對唔住呀魚蛋!!! 下次補番數!)

然後係旺角先達隔離間串串檔, 又想食. 但係當然好乖咁忍住 (忍得好辛苦!) 呢間串串檔就勁囉. 諗得出既串串檔小食都會有. 魚蛋燒賣唔晒講, 碗仔翅, 生菜魚肉, 煎釀三寶呢啲不在話下, 仲有我好鍾意食既墨魚丸,牛丸,司華力腸, 炸雞脾, 煎菜肉餃都有喎. 我比較少食既臭豆腐, 牛雜都有. 好勁! 同埋我覺得最勁既係, 買串串要拎飛等喎! 無乜邊間要拎飛㗎. 好有系統同秩序. 人地真係有諗過個logistic. 隔離有得買台式奶茶. 買咗串串買嘢飲會有discount添. 利害利害!

好想食呀!!!!!!! ><

如果所有款都買一個緊住再買台式奶茶, 食完後唔知會唔會可以即刻請sick leave呢?

夢想早晨

好好好飽.

好喜歡飲完後, 只需要三分鐘就可以轆番屋企既感覺. 好爽呀!!

>>>>>>>

我夢想中既早上, 係我可以煮早餐俾自己食, 然後施施然去返工. 但我呢啲返工咁準時既人, 要有時間煮早餐就尤如要係一秒內煲熱啲水一樣咁趕!!!

但係為咗達成我既夢想, 我略盡綿力買咗一盒pancake mix. 只需要加水, 煎兩煎就攪點. 好! 睇吓盒mix過期前會唔會開到齋先!!!

住家飯

自從病完後, 誓要令自己抵抗力提升!!! 決定食多啲住家飯 [即係自己煮!!!] 除了煮飯, 還自己煲湯. [好勁呀!!!]

亞媽: 你成日無湯水唔得架 [係佢口頭禪]

所以, 昨晚煲了花旗參湯俾自己飲. 今晚又可以飲. yeh!

喺放工前要諗到今晚煮咩食, 根住去買餸...@@~ 日日咁諗法, 白頭髮都會多幾條.

[思想中...]

宇宙胃

如果可以食哂一個飯盒, 對於我來說, 是好驚嚇的. 我個胃有如一粒豆咁細. 經常食兩啖就話飽. 但當我在吃大家樂飯盒, [係呀, 無人倍我吃飯, 要食飯盒!!!] 吃得津津有味時, 驚覺只食剩幾啖飯時, 當堂好驚!! 即刻合埋個飯盒, 掉咗. [但係我未飽呀 @@"]

點解?????

我個胃, 變成宇宙咁大了嗎? 咩事先???

有趣晚餐

當心情麻麻時, 都會有朋友冒起. 真安慰.

差不多三小時的晚飯, 好有趣的一個晚上. 我喜歡談一些不著邊際的話題. 聽聽朋友兒時的遭遇及奮鬥史 [@@???], 研究下朋友們中間所發生的, 是很有趣的事. 這樣, 能夠日積月累的去認識身邊朋友的種種, 我覺得是一種福氣. 有時你想去了解的朋友未必與你有著這樣相同的相法. 有時會無心情或時間去實行. 有時未必遇到這樣的人讓你去了解. 可以有九千種原因令你不能如願如償. 所以, 我覺得是莫大的福氣.


是晚去了 soho 的 al dente. 食物依然有水準, 但就是server麻麻.

我始終都是鍾情意大利食物. 呀! 又陷入困境裡..... >< 有回憶真係慘.

Deep Fried 3 Babies?!

星期一嚟到六點已經無心情做嘢, 何況老闆唔係到. 剛才與孫同事去食街邊串串. 係, 5點鐘大搖大擺去食街邊嘢. 食到滿足地飽. 在等待7點的來臨. 即閃!!

話說回到公司時, 孫同事傳E貓問我:

孫 : forget to ask u.... are the deep fried 3-babies ok? [究竟想點呀哩位同事??]
我 : 好一個deep fried 3-babies呀吓!!! 睇完都令人髮指!!!
孫 : 髮指等唔等於thumbs up?
我 : 絕對唔等於. 髮指等於 (a) 想爆粗 or (b) 想打你鑊金
孫 : 乜你咁暴力? 正如周星星話: "我又何嘗唔係想打你鑊金呀"

請問我邊樹有得罪你呢? 使唔使咁對我先!!
將會是口乾的一晚. 努力!