live chat的威威力

依家啲公司做生意，實在乜嘢gimmick都諗過。以前想quote自由行package嘅價，一係就打電話去旅行社問，一係就親身去旅行社攞資料。近期，可以e貓agent去問價，已經覺得十分方便。但原來現在有啲仲方便嘅方法....

今日，上了專業x運的網址，想看看某地方的自由行價錢。係網頁的一角，看見expert online的icon。我手多多咁去click，就係咁，有位專業人士message我，問我需要乜野旅行資料。@@ 感覺就好似我行入hermes，有sales好親切咁問我：小姐，有咩可以幫到你？而唔係俾白鴿眼我睇！（其實關咩事呢？）總之，成件事令我覺得去qoute價呢個process，頓然無咁苦悶同煩。為了方便，可能以後都會幫襯專業x運！！！live chat的威力真係大！

唔怪得知咁多男人喜歡live chat。明白哂！XD

冰天雪地

香港的生活, 令我最不能適應的, 是室內沒有暖氣. 係屋企係要著大大大大外套. 近兩年, 習慣了屋企這種生活.

但勢估唔到, 上環公司亦係一個冰箱 (！！！) 當放眼去看, 大半人都係公司著住羽絨, 一杯一百度嘅水,用蓋掩著,竟然唔使一個鐘就變成室溫水 @@ 手手腳腳凍到結哂冰. 實在係好難頂同好過份.

好！過！份！呀！

好！ｘ！凍！呀！

點做嘢喎！！！　＞＜

生命中不能承受的蠢

在澳洲牛奶公司遇見一個好蠢的女人。那女人坐在我旁邊。澳洲牛奶公司是一間餐牌簡單都不能再簡單的食肆。只得快餐或常餐 （無錯，就好似麥兜的故事！）

快餐 （$26) 有牛油包，煎雙蛋，熱鮮奶。
常餐 ($30) 有牛油包，煎雙蛋火腿，叉燒意粉，咖啡或茶。

唔想叫餐，可以散叫。但如果食三文治叫野飲，一定係叫餐平啲。就係咁簡單。坐在我旁邊的女人，想叫常餐，但係又話食唔晒。個哥哥就叫佢食快餐，跟住佢又話想食三文治，個哥哥已經話個餐可以轉三文治。跟住佢又問散叫腿蛋治同熱鮮奶要幾多錢，哥哥話要$31。佢話：“咁散叫咪仲平？” @@ 我當堂呆咗。心諗：點呀，識唔識計數㗎？

最後，攪完一大輪，佢係叫咗腿蛋治同熱鮮奶。盛惠$31元整。

唉！！！點解會有啲咁嘅人架！！！ 我一路食，一路好想問佢：你識唔識計數架！？？

日常怪事

乘巴士回家時，我對面坐著一名男仕。他的外型如下：

＠ 貌似裝修佬
＠ 著住殘舊的polo tee shirt在內，外面著住殘舊的風褸
＠ 腰間有一個殘舊腰包
＠ 手拿著飯盒同拖住一個喼

在途中，他突然從他的腰包內拿出一支 nivea 潤唇膏（識嘢喎！）來搽嘴。（仲要搽得好姿整 @@）我當時應該O咗嘴 :O，因為我認識的男性朋友們打死都唔搽潤唇膏，好像搽潤唇膏係一啲超唔型或有損型像嘅行為，寧原嘴唇爆晒爛晒標晒血先安樂。所以，一個貌似裝修佬嘅男人會做呢個動作，對於我，簡直係世界奇聞！

失覺晒！！！

牛一

過了忙碌的一星期，但要做的始終都不會有完結的一天，所以都係算吧！

今天過了開心的一天....

＠ 朝早去上班，做了一整朝早的bumblebee。

@ 下午約了朋友仔們吃飯，又是充滿我至愛的無聊時刻。

@ 午飯後，過著闊太般的生活 ：去發型屋剪及電發。@@" 之前的我勢神劈願話唔再電發，今朝只是盤算著修剪少許，頂多剪少少留海就算。點知入到去就一發不可收拾!!! =.= 又再次攪足四個鐘！走時，我感覺我pat pat已經由3D變成2D。

@ 之後，飛趕去與貓男友及他好友kp和女友吃晚飯。皆因他們生日都在十二月，我之前係 sherrybelly 店鋪 order 咗生日杯蛋糕。杯蛋糕上寫了貓男友及kp的initials。超級可愛耶！ （味道仲好好喎！好真材實料，皆因食完後飽到上心口。）

 ＠ 除了杯蛋糕，在 sherrybelly 處還 order 了好應節的聖誕節曲奇。要了雲呢嗱和 earl grey味。無錯，係影唔到啲曲奇嘅！（至於好唔好味，就要聽日問吓壽星仔先知嘞！）

 ＠  希望大家有一個快樂的聖誕~~

無常....平安....

近來工作實在太忙，每天回家眼睛累到不想再望任何嘢。仲使我有千千萬萬嘅事情想打，但已經唔記得晒。orz

***********

人生無常，好像明白但其實一丁兒都不能面對。人有生老病死，亦好像明白但要面對時是多麼的艱難。幾個月前，知道朋友的媽媽患了癌症，內心替她難過。進行了治療，但完全無效。就是這樣，人生被眶了一個時限。一個任何人都會覺得太短的時限。這幾個月她家人去了幾次的旅行，我想為的是去做一些以前想做但未做的，或是在這時限裡一家人去共度快樂的時光。

每次與這朋友見面，我都不禁去問侯伯母的近況。但又不想問得太多，免得她太傷心。我實在無法去理解她心內每天所承受的痛苦或傷感。是否每天都像在倒數中度過？她說每天都在回家前哭一場，回家後只可掛上笑面，為的是避免她媽媽擔心及影響病情。我想：多難過的日子。

我可以做的，就只有默默的為她一家禱告，及嘗試找機會向她們傳福音。我一直求神在這短暫的時間裡面給我一個機會....在患難裡，有誰不想有平安？

四川辣辣辣....

近期, 心思思想再次吃辣. 便到家附近出名四川店買外賣. 第一次只買了口水雞酸辣粉.

好喜歡它的麻辣味道. 用了好香的香料. 吃得出放了好多花椒. 但口水雞反而無咩特別. 就像普通白切雞. 不過整體味道都算一流!! 第一次買所以只叫了小辣但已經覺得頗辣. 吃完後, 好想下次試中辣.

時隔幾個星期後, 再去幫襯. 買了酸豆肉碎酸辣粉同麻辣青瓜. 回家時, 一開個外賣盒....點解青瓜係白色同埋有腳趾嘅? (老眼分花??) 原來俾錯咗雞腳我.... v_____v 不過算數, 照食!!!

今次依然叫了小辣. 酸豆肉碎幾好味. 但因為吸了辣油, 所以愈食愈辣! 好刺激!!! 麻辣雞腳本身望落去好似一啲都唔辣. 但當我KO整盒時, 係辣到出唔到聲 >< 一個人食一盒實在太多啦!!!

結果今朝肚痛到爆炸!!!! 下次會挑戰涼麵同其他小食.

p.s. 這間四川小店, 原來每個月好似 21 至 27日都唔開門, 聽講老闆每月都親自去四川買食材回來. 好認真呀!!!! 我會多多幫襯~

便利店的親切感

原來, 當你步入一間ok便利店時, 未開口個亞姐已經懂得問 : "飲咩呀今日? 熱檸水呀?". 嗰一刻真係覺得好親切. 亞姐竟然記得我飲開啲咩!! 令我想呢一世都幫襯呢一間ok便利店!!!

但係我好善變囉. 我今日唔係飲熱檸水呀. 飲咗熱horlick呀!

唔好意思亞姐!!!

靈異事件

有時我會覺得發生在自己身上的事情好騎呢.....

經常發現自己的頭髮會自己打結!!!! @@ 唔係一次, 係多次!!!! 凝住屋企有鬼親我訓覺時同我啲頭髮打結. 每次逼不得已都要將打咗結嘅頭髮剪咗去, 因為解唔番.....T____T

其實無咩理由會自己打結喎!!!!

一個字 : 驚!!!!!

高茶

過去的星期日, 與朋友仔們去了ifc內的agnes b吃high tea. 這是我頭一次去agnes b的餐廳. 好高級嘢.....

三個人叫了貴的 tea set ($318). 比起 $288 tea set 多了兩杯 oyster shot 同兩個 lobster with caviar. 吃完了整個 tea set, 最好吃的是 oyster shot. 用上了 rum, 加了點 lemon juice 和 green apple dice. oyster 應該係 kumamoto. 但其實 oyster shot 一點製作難度都沒有, 只要有新鮮的貨源.

其餘的都實在太普通. 一點特別都沒有. 有點兒失望. 但要讚的是他們的室內環境, 有著令人很舒適的感覺. 三小時的下午茶在毫無先兆下就過了. 快得令人詫異!!

為了延續我們的食食達人傳統, 今個星期日會再次在家煮飯仔. 好, 研究食譜去!!!

食物的奧秘

最近在想, "呀....中國人真的很愛吃." 吃重要到, 無論什麼環境, 食物都會是其中一個要討論或預備的環節.

> 朋友相聚見面, 要討論去邊到食飯
> 同親戚見面, 總是食飯
> 拍拖, 會問 : "去邊到食飯好?"
> 結婚, 親戚朋友第一時間係問你係邊到擺酒
> 白事, 亦係要話俾人知你係邊到擺解穢酒
> 丈夫回家會問太太 : "今晚有咩餸?"
> 媽媽會問仔女 : "今晚番唔番嚟食飯?"

食物就好像人與人之間無形的連繫. 每天, 默默地維繫著不同的關係.

我在想, 如果我不再需要做食食達人, 我究竟有啲咩生存意義???????

我好想去．．．/ 謎

＞狂食生蠔
＞打邊鑪
＞happy hour 狂飲

幾時先有時間做呢？？？ 真係搵食艱難。

***********

看了王迪詩的blog一段時間，有啲文章實在覺得非常到point！今次 My Real Boss 真係好有共鳴。（kerokerokerokerokero！！！） 我想話，呢個世界，admin / 秘書真係大曬㗎囉！點解公司成日都只包庇啲低效率無建設嘅同事？點解？？呢個係一個謎。不過，原來全世界嘅公司到係一樣，這是我唯一的安慰，我唔係獨自自怨自艾。善哉善哉。

一周回顧

＞星期日同朋友仔睇Grease，好睇到無嘢好講。故事好簡單兼老套，但成套musical嘅精髓係佢啲歌同舞。簡直會令人熱血沸騰，令人好有衝動由座位彈起一齊載歌載舞。去到尾聲，全場high爆，一齊起身又叫又跳，同睇演唱會無咩分別。滿足至極。令整件事嘅滿足程度推到頂點嘅係：張飛半價囉！！！

＞有天心血來潮，想感受一下冬天嘅氣氛，所以去星巴克買咗冬天先有嘅gingerbread latte同新出嘅caramel cheesecake。整晚什麼都沒有吃，在家歎latte同cheesecake。感覺時間好像為我停頓了。

＞係屋企執拾時，發現了好友前一陣子送我的小禮物。係一個好cute嘅grand piano nano block。好好好喜歡！個包裝好靚所以一路都唔捨得拆。但唔拆又無得玩。我諗都係時侯開封㗎啦！唔捨得呀！！！><

＞最後送上近期肥貓艷照一幅。希望大家努力。周日就快到㗎啦！！！！ROAR！！！

家中的飲料

 我家中雪櫃可以長年累月甚麼都無，皆因我甚少煮食，連水都唔飲多啖。但我靚媽係都好鍾意起勢咁俾嘢我。

玫瑰花茶：呢隻牌子好似好鬼貴 @@ 靚媽好dum本

有機茶包：係英國買。高檔野喎！裡面有八十個茶包囉痴線！

杭州嘅雨前龍井 ：呢罌嘢應該飲十年都飲唔晒 ><

杭州嘅菊花。配雨前龍井幾好飲㗎。

因為呢排經常貧血，所以靚媽又俾紅棗，杞子同龍眼肉我煲水飲。

靚媽又話得閒要煲下花旗心水飲喎。

自家製嘅咸金桔。好味道。

唔幾得邊年christmas交換禮物抽到嘅blueberry bliss tea。

日日都要不停係咁飲先可以飲晒佢地囉！點攪呀？？？

life is....

工作總會有一個 cycle. 就係每隔一段時間, 都會十萬個燥底. 為咗要撲滅我嘅燥火, 過去的一星期都要不停看電視. 我終於交回我的電視債. yeh! 電視係多麼的重要呀!!!

除了看電視, 訓覺係另一個撲滅燥火嘅好方法. 星期六日不停咁訓. 完全可以突顯我是豬的性格.

一點起身 -> 落街食午飯 -> 番屋企 -> 再訓 -> 六點起身 -> 出街食晚飯 -> 上網睇電視 -> 訓覺

咁樣嘅schedule, 唔知會唔會俾人打 ?

係時候出動啦!

咩話?

今日睇義海豪情，學咗新嘢!!

“你咪當我膝頭哥未食過辣椒醬.”

大概嘅意思應該係 “你唔好當我係傻” 咁解. 有無人知點解? 膝頭哥同辣椒醬究竟有咩關係呢?

廣東話真係無得頂! 真係學一世都學唔晒!

電視迷

最近, 決定重拾我電視迷的名堂, 係hulu不停看電視節目. 我最愛看的有:


@ grey's anatomy
@ bones
@ chuck
@ castle
@ glee
@ the event

為咗要追上進度, 依家放工後好唔得閒!!! 晚晚都要係咁追追追. >< 但我仲想睇埋日劇呀!!~~~

兩極化

我是極端份子!!!

@ 我可以一日都唔飲水. 但當我有心機飲水時, 我會飲啲好高尚嘅飲品. 例如會沖花茶 (玫瑰花茶喎!), 花旗參茶, 雨前龍井!! 當全日都要衝鋒陷陣時, 突然間, 係drawer攞盒雨前龍井出嚟, 真係當堂高級咗. 我有諗過攞我屋企嘅紫砂茶壺番公司沖茶 (開番堂茶道, 無得頂!!) 不過唔想俾我老闆怒睥, 所以打消念頭.

@ 我可以一日唔食嘢, 或者一連好多日食啲唔正常嘅食物 e.g. 一日不停食 cereal, 一日不停食 kimchee, 一日不停食 biscuit. 但當我食食達人上身時, 我會去最好的地方吃美味的食物. 好高要求的. (真係頂自己唔順)

@ 我可以什麼都不愛, 但當我選擇去愛時, 我會全心全意. 以前的我, 非常硬頸, 現在的我, 什麼都沒意見. 都唔知係好定壞. @@

要學習中庸之道去平衡自己的超級兩極化. 努力!!

小宇宙的爆發

人生總會遇上一些莫名其妙的人. 而這些莫名其妙的人, 都有著令我爆血管的能力. 

我的耐性是何其的低. 今日發咗兩次脾氣. 係好大嘅脾氣. 有想打爛電話嘅衝動. 但礙於我老闆坐係我隔離, 我只好用我畢生嘅小宇宙去壓制自己. 真係無敵超級辛苦!!!!! 我老闆完全聽到哂我爆炸電話內容, 佢好輕描淡寫咁講咗一句:

"搵佢老闆啦."

唉. 我心諗, 你就話可以搵佢老闆. 我點搵佢老闆呀. =.= 唉. 都唔知我挨生挨死都係唔想煩到佢. 真係有苦自己知. 不過, 佢開到聲, 我當然係好順手咁拋個波俾佢. yeh!

今日又唔知死咗幾多腦細胞. v_____v

obsession

唔知點解, 每逢到秋天, 就會特別想念美國. 滿腦子都係:

美國美國美國美國美國美國.......美國

就黎人都癲 >< 


roooaaarrrr!